Books

‘सो कुल… टेक २’ हे शीर्षक आल्हाद गोडबोलेंना सुचलं आणि मला ते पहिल्याच क्षणी आवडलं. पहिल्या टेकनंतर येणाऱ्या दुसऱ्या टेकमध्ये जशी अधिक सहजता, अनुभव आणि लय असते, तसाच हा प्रवास. २०१० मध्ये ‘सो कुल…’ प्रकाशित झाल्यानंतर २०११ ते २०१४ या काळात ‘लोकसत्ता’च्या ‘व्हिवा’ पुरवणीत पुन्हा दर आठवड्याला ‘सो कुल…’ लिहिण्याची संधी मिळाली. काम, लग्न, मातृत्व, चित्रपट, प्रवास आणि आयुष्यातील अनेक महत्त्वाच्या घडामोडींसोबत हे लेखनही अखंड सुरू राहिलं. या पुस्तकासाठी दीडशेहून अधिक लेखांमधून काही निवडक लेख घेतले आहेत. त्यांत दहा वर्षांपूर्वीच्या माझ्या संवेदना, समजुती आणि त्या काळाचं जग जसं होतं तसं जपून ठेवलं आहे. या प्रवासात साथ देणाऱ्या वाचकांचे, ‘लोकसत्ता’, ‘राजहंस’ आणि विशेषतः माझे स्नेही आल्हाद गोडबोले यांचे मी मनापासून आभार मानते. लोभ असावा… रेडी? रोल, कॅमेरा… सादर करीत आहोत – ‘सो कुल… टेक २’!